काठमाडौं । पश्चिम नवलपरासीको प्रतापपुर गाउँपालिकाले एकैपटक ९२ जना कर्मचारी हटाएपछि समग्र सेवाप्रवाह नै प्रभावित भएको छ। कर्मचारी कटौतीसँगै गाउँपालिकाका तीन शाखा पूर्ण रूपमा बन्द हुन पुगेका छन् भने वडा कार्यालयहरूले पनि नियमित सेवा दिने क्षमतामा गिरावट आएको स्थानीय तहले जनाएको छ।
संघीय सरकारको खर्च कटौतीसम्बन्धी परिपत्रअनुसार कर्मचारी घटाइएको भए पनि अहिले गाउँपालिकामै जनशक्ति अभाव गम्भीर चुनौती बनेको छ। गाउँपालिका अध्यक्ष उमेशचन्द्र यादवका अनुसार कम्तीमा २० जना कर्मचारी तत्काल अपरिहार्य भएकाले भोलि विशेष गाउँसभा बोलाई आवश्यक निर्णय गर्न लागिएको हो। हाल रोजगार, भूमि व्यवस्था तथा महिला–बालबालिका शाखा कर्मचारी नहुँदा पूर्ण रूपमा निष्क्रिय छन्। शाखा नै बन्द गर्नु परेको अवस्थाले न्यूनतम सेवा निरन्तरता कठिन बनेपछि केही कर्मचारी थप्नैपर्ने स्थिति आएको अध्यक्ष यादवले बताए।
उनका अनुसार, “कर्मचारी नथपिए सेवा–प्रवाह ठप्प हुने खतरा छ। त्यसैले आन्तरिक स्रोत वृद्धि गर्ने उपायहरू खोजिरहेको छौँ।” गाउँपालिकाले कम आन्तरिक आम्दानीका कारण आयवृद्धिमा जोड दिएको छ। यसका लागि प्रतापपुर–५ बैदौलीमा पशु हाटबजार सञ्चालन गरी चालु आर्थिक वर्षमा ५० लाखसम्म आम्दानी गर्ने लक्ष्य राखिएको छ। साथै स्थानीय खोलाबाट नदीजन्य पदार्थ ठेक्का दिएर आम्दानी बढाउने योजनामा काम अघि बढाइएको गाउँपालिकाले जनाएको छ।
गाउँपालिकाभित्रका माछा पोखरी तथा विभिन्न हाटबजारलाई व्यवस्थित गर्दै आन्तरिक आय बढाउने योजना पनि अघि बढाइएको छ। अहिले गाउँपालिकाको आन्तरिक स्रोत करिब एक करोड ३० लाख मात्र रहेकाले यसलाई कम्तीमा डेढ करोडले बढाउने लक्ष्य छ। स्रोत सुनिश्चित भएपछि आवश्यक कर्मचारी क्रमशः थप्दै जाने अध्यक्ष यादवले स्पष्ट पारे।
