काठमाडौं । बुलौदी र फिर्केखोलाले फेवातालको गाईघाटमा थुपारेको गेग्रान निकाल्न थालिएको छ। पोखरा महानगरले त्यहाँको करिब ३० रोपनीमा जम्मा भएको गेग्रान निकाल्न फूलबारी कन्स्ट्रक्सनलाई जिम्मा दिएको छ। फूलबारी कन्स्ट्रक्सनले १८ लाखमा त्यहाँको चार हजार पाँच सय घनमिटर माटो निकाल्ने जिम्मेवारी पाएको हो। यही पुस मसान्तसम्म त्यहाँको माटो, गेग्रान, फोहोर निकालिसक्नुपर्ने सम्झौता छ। सोमबारबाट कम्पनीले माटो निकाल्न सुरु गरी नजिकैको कोमागाने पार्क क्षेत्रमा व्यवस्थापन गरिरहेको महानगरका सहरी विकास, पर्यटन तथा वातावरण महाशाखा प्रमुख विमलरञ्जन कार्कीले जानकारी दिनुभयो।
गाईघाटमा मिसिने खोलाले त्यहाँ ठूलै टापु बनाएको छ। ढुंगामाटो, गेग्रान र फोहोर थुप्रिँदै जाँदा तालमा बनेको टापु हटाउन लागिएको हो। अहिले ताल पुर्ने माटो निकाल्ने र खोलाका ठाउँ ठाउँमा चेकड्याम निर्माण गरी तालसम्म फोहोर र माटो आउन नदिने योजना छ। यहाँको माटो र फोहोर हटाउन वातावरण संरक्षणका लागि महाअभियानले बारम्बार आवाज उठाउँदै आएको छ। अभियन्ता रामबहादुर पौडेल तालमा बनेको टापु हटाएर सकेपछि खोलाका ठाउँ ठाउँमा चेकड्याम बनाएर माटो र गेग्रान आउनबाट रोक्नुपर्ने बताउनुहुन्छ।
पोखरा महानगर फिर्केखोलाको खोलाघरभित्र पर्ने स्थायी तथा अस्थायी संरचनासमेत हटाउने योजनामा छ। प्राकृतिक र मानवीय अतिक्रमणबाट साँघुरिँदै गएको फेवातालको अतिक्रमण हटाउन सर्वाेच्च अदालतले २०७५ मा ६५ मिटर मापदण्ड कायम गरी तालको सौन्दर्यकरणसमेत गर्न आदेश दिन पनि त्यो पालना हुन सकेको छैन। गोरखापत्र
