काठमाडौं । बाह्रबिसे नगरपालिका-२ नम्बर वडा कार्यालयले आफ्ना वडाभरका सात वटा सामुदायिक बिद्यालयका पाँच सय २३ जना छात्रछात्रालाई न्यानो ट्रयाकसुट सहयोग गरेको छ। वडा कार्यालयको आठ लाख बजेटबाट वडाभरका विद्यार्थीहरुलाई जाडोबाट जोगाउनका लागि ट्रयाकसुट सहयोग गरेको उक्त वडाका अध्यक्ष रेशम बहादुर तामाङले जानकारी दिनुभयो । चिसोका कारण विद्यार्थीहरु विद्यालयमा नियमित गराउनका लागि न्यानो कपडाका रुपमा सो पोशाक वितरण गरिएको उहाँले थप्नुभयो ।
नेपाल राष्ट्रिय माध्यमिक बिद्यालय, ईश्वरीमाला आधारभूत विद्यालय, कमलादेवी आबि, सुनकोशी माबि, कुम्बेश्वरी आबि, सेतीदेवी आबि, मंगलादेवी जनजागृति आबिका बिद्यार्थीहरुलाई ट्रयाकसुट वितरण गरिएको अध्यक्ष तामाङले बताउनुभएको छ । न्यानो कपडा पाएपछि शिक्षण सिकाईमा उत्साह मिलेको ईश्वरीमाला आबिका प्रधानाध्यपक गान्वा बिकले प्रतिक्रिया दिनुभयो । साथै उक्त विद्यालयका पूर्व विद्यार्थी सुवास खड्काले बिद्यार्थीहरुलाई दुई सय थान उनको टोपी सहयोग गर्नुभएको थियो । बाह्रबिसे नगरपालिकाकी उपप्रमुख मञ्जु तामाङ, वडा अध्यक्ष रेशम, वडा सदस्य रिता रसाइली लगायतको बाहुलीबाट विद्यार्थीलाई पोशाक बितरण गरिएको थियो । गोरखापत्र
