काठमाडौं । लुम्बिनी प्रदेश सरकारले एक करोड रुपियाँभन्दा बढी खर्च गरेको बाँकेको खजुरा गाउँपालिकास्थित डि गाउँमा रहेको मिनी रङ्गशाला अझै अधूरै रहेको छ । पालिका स्तरीय रङ्गशालामा तीन वर्षदेखि बजेट नपरेकोमा गत वर्ष प्रदेश सरकारले २० लाख रुपियाँ बजेट विनियोजन गरेको भए पनि अझै रङ्गशाला पूरा हुन सकेको छैन । स्थानीय न्यू डाँफे स्र्पोटस क्लवका अध्यक्ष बालाराम खत्रीले प्रदेश सरकारले पालिका स्तरीय रङ्गशाला निर्माण सुरु गर्नु सह्रानीय काम भए पनि वर्षौसम्म काम पूरा नहुनु दुःखद भएको बताउनुभयो । खत्रीले भन्नुभयो, “रङ्गशालाभित्रको भवनलाई क्लव भवनको रुपमा समेत प्रयोग गर्ने गरि स्थानीय बासिन्दाको चन्दा सहयोग लिएर निर्माण गरेपनि प्याराफिटको काम अधुरै छ ।”
यसैबिच रङ्गशालाको अवस्था बारे जानकारी लिन पुग्नुभएका निवर्तमान सामाजिक विकास मन्त्री तथा लुम्बिनी प्रदेशसभा सदस्य रत्न खत्रीलाई क्लवका पदाधिकारीसहित स्थानीय बासिन्दाले रङ्गशालाको अधूरो कार्य पूरा गर्नका लागि आवश्यक बजेट विनियोजनका लागि पहल गरिदिन अनुरोध गरेका छन् । खत्रीले आगामी आर्थिक वर्षको बजेटमा अपूरो रङ्गशालाको निर्माण कार्य पूरा हुनेगरी बजेट विनियोजनका लागि आफुले पहल गर्ने प्रतिवद्धता व्यक्त गर्नुभयो । गोरखापत्र
