काठमाडौं । काठमाडौँ महानगरपालिकाले स्वास्थ्य सेवा प्रवर्द्धन गर्ने उद्देश्यसहित कीर्तिपुर अस्पताललाई स्वास्थ्य उपकरण खरिदका लागि आर्थिक सहयोग गर्ने भएको छ। महानगरपालिकाको वार्षिक कार्यक्रमअन्तर्गत अस्पतालमा आवश्यक मेडिकल उपकरण खरिद गर्न अनुदान प्रदान गर्ने विषयमा सम्झौता सम्पन्न भएको हो।
कार्यवाहक प्रमुख सुनिता डङ्गोल, प्रमुख प्रशासकीय अधिकृत सरोज गुरागार्इं तथा शिक्षा–स्वास्थ्य समितिका संयोजक चिनीकाजी महर्जनको रोहवरमा सम्पन्न सम्झौतामा काठमाडौँ महानगरपालिकाको तर्फबाट स्वास्थ्य विभाग प्रमुख दीपककुमार केसी र कीर्तिपुर अस्पतालका तर्फबाट अध्यक्ष डा. भरतकुमार प्रधान श्रेष्ठले हस्ताक्षर गर्नुभयो।
काठमाडौँ महानगरपालिकाले चालु आर्थिक वर्षको स्वीकृत कार्यक्रमअन्तर्गत मेडिकल उपकरण खरिद अनुदानका लागि रु एक करोड विनियोजन गरेको छ। सम्झौताअनुसार अस्पतालले सार्वजनिक खरिद प्रक्रियामार्फत स्वास्थ्य उपचारमा आवश्यक एक थान एनेस्थेसिया मेसिन, २५० केभीएको एक थान जेनेरेटर तथा ५०० एम.ए. क्षमताको एक थान डिजिटल एक्स–रे मेसिन खरिद गर्नेछ।
काठमाडौँ महानगरवासीसहित कीर्तिपुर अस्पतालमा उपचारका लागि आउने बिरामीलाई गुणस्तरीय, सहज र प्रभावकारी स्वास्थ्य सेवा प्रदान गर्ने उद्देश्यले महानगरपालिकाले सहयोग गरेको हो। कार्यवाहक प्रमुख डङ्गोलले जलनसहितका जटिल उपचार सेवा प्रदान गरिरहेको अस्पतालको क्षमतालाई थप सुदृढ बनाउन अनुदान उपलब्ध गराइएको बताउनुभयो।
अस्पताल नाफामुखी नभई सेवा भावनाबाट सञ्चालन भइरहेको उल्लेख गर्दै अस्पतालका अध्यक्ष डा. भरतकुमार प्रधान श्रेष्ठले जलनका बिरामीको उपचार जटिल र संवेदनशील हुने भएकाले यसलाई सहज बनाउन काठमाडौँ महानगरपालिकाबाट निरन्तर सहयोगको अपेक्षा गरिएको बताउनुभयो ।
