काठमाडौं २३ वैशाख । प्रधानसेनापति प्रभुराम शर्माले काभ्रेपलाञ्‍चोक जिल्ला, रोहिणी भञ्‍ज्याङ्गस्थित फायरिङ्ग रेञ्‍जमा नेपाली सेनाद्वारा संचालित विशेष फौज बाहिनी स्नाइपर प्रतियोगिताको निरीक्षण गरेका छन् ।
नेपाली सेनाले जारी गरेको विज्ञप्तीका अनुसार उनले ३०० र ५०० मिटर रेञ्‍जमा स्नाइपर हतियारबाट फायरिङ्ग,Fox Hole,स्नाइपर मचान तथा विशेष फौज बाहिनी अन्तर्गतका युनिटहरुले प्रदर्शन गरेका विशेष अपरेशन सम्बन्धी कारवाहीको डेमोन्स्ट्रेशनको अवलोकन समेत गरेका छन् ।
यसैगरी प्रधान सेनापति शर्मालगायत नेपाली सेनाका रथीवृन्दहरुको सहभागितामा पेस्तोलबाट फायरिङ्ग प्रतियोगिता संचालन समेत गरिएको नेपाली सेनाले जनाएको छ ।
यस्तै सेनापति शर्मा निरिक्षणकै क्रममा रहेका बेला उनले नगरकोटस्थित श्री नेपाली सैनिक वार कलेजको निरिक्षण समेत गरेका छन् । दुई दिने निरीक्षण भ्रमणमा रहेका प्रधान सेनापति शर्मा भोली भक्तपुर जिल्ला, लप्टनडाँडास्थित श्री नं ७ बाहिनी अड्‍डाको निरीक्षण भ्रमण गर्ने कार्यक्रम रहेको सेनाले जारी गरेको विज्ञप्तीमा भनिएको छ ।