महेन्द्रनगर । पुर्वमन्त्री एवं नेपाली कांग्रेसका प्रभावशाली नेता रमेश लेखकले भीमदत्त नगरपालिकाभरीमा डुबान र कटानको समस्या रहेकाले गुरु योजना बनाएर कटान नियन्त्रण गरी समाधान खोजिने बताएका छन् ।
बिहीबार भीमदत्त नगरपालिका–१० मा आयोजित चुनावी घरदैलो कार्यक्रममा बोल्दै नेता लेखकले पछिल्लो समय यहाँ कटान र डुबानको समस्या रहेको बारे आफू जानकारी रहेको बताउँदै निर्वाचनपछि त्यसको समाधानमा लाग्ने योजना सुनाए ।
कञ्चनपुर निर्वाचन क्षेत्र नं। ३ बाट सत्ता गठबन्धनका उम्मेदवार समेत रहनु भएका नेता लेखकले अबको पाँच बर्ष गठबन्धनको सरकार विकासकै निम्ती काम गर्ने बताए ।
“ हामी अनाश्वयक आश्वासन दिदैनौं ।” उनले भने–“ निर्वाचन सकिएपछि गठबन्धनले काम गरेर देखाउँछ ।”
विगतमा पनि यहाँ माओवादी सम्मिलित गठबन्धनकै सरकारका पालामा ठुला विकासे आयोजना आएको स्मरण गराए ।
यहाँ ठुलो व्यापारिक, पर्यटकीय धार्मिक र औद्योगगिक नाका बनाउने योजना रहेको लेखकको भनाई छ ।
“ प्रदेशदेखि केन्द्रसम्म गठबन्धनको सरकार बन्छ ।” उनले भने–“ अब संविधान र व्यवस्थाका लागि झगडा भन्दा पनि विकासका निम्ती काम गर्ने हाम्रो सोच छ ।”
चुनावी घरदैलो सभामा नेपाली कांग्रेसका केन्द्रीय सदस्य यज्ञराज जोशी, निर्वाचन क्षेत्र नं। ३ क का सत्ता गठबन्धनका उम्मेदवार माओवादी केन्द्रका नेता टेकेन्द्रप्रसाद भट्ट लगायतले मन्तव्य राखेका थिए ।
पाँच बर्ष नेकपा एमालेले जित्दा यहाँ कुनैखालको विकास नभएको नेताहरुको आरोप थियो ।