काठमाडौँ – संयुक्त अरब इमिरेट्सको दुबईमा भइरहेको संयुक्त राष्ट्रसंघीय जलवायु सम्मेलन (कोप २८) मा नेपालमा भएको जलवायुजन्य हानी नोक्सानी समेटिएको वृत्तचित्र ’हिमालको पुकार’ (द प्ली अफ माउण्टेन) प्रदर्शन गरिएको छ ।
उक्त वृत्तचित्रमा सगरमाथा, अन्नपूर्णसहितका हिमाल पग्लिँदा त्यसले जनजीवनमा पारको असरलाई देखाइएको छ । त्यस्तै, जलवायु परिर्वनका कारण नेपालको मनाङ, मुस्ताङ, सिन्धुपाल्चोकको हेलम्बु, मेलम्ची, डोल्पाको फुक्सुण्डो, तराई मधेशमा गएका बाढी पहिरो र क्षति समेटिएको छ ।
वृत्तचित्रमा प्रभावित क्षेत्रका बासिन्दाको आवाज समेटिएको छ भने नेपाललाई जलवायु न्यायका लागि विशेष ध्यानकर्षण गराइएको छ ।
उक्त वृत्तचित्रको लेखन र निर्देशन पत्रकार बालकृष्ण बस्नेतले गरेका हुन् । सम्मेलन अन्तर्गत नेपाल पेभिलिएनमा वन तथा वातावरण मन्त्रालय र साथसाथै संस्थाको संयोजनमा भएको कार्यक्रममा वृत्तचित्र प्रदर्शन गरिएको हो । वृत्तचित्र प्रदर्शनपछि त्यसबारे विभिन्न विज्ञहरुबीच अन्तरक्रिया समेत भयो । अघिल्लो वर्ष इजिप्टमा भएको जलवायु सम्मेलन कोप २७ मा पनि बस्नेतकै लेखन, निर्देशन रहेको वृत्तचित्र ’द भ्वाइस् फर क्लाइमेट जष्टिस्’, प्रदर्शन गरिएको थियो ।
