काठमाडौं । कालीकोट जिल्लाको नररहीनाथ गाउँपालिका १ कोटवाडामा निमार्ण भएको सुनथराली विमानस्थलमा परीक्षण उडान भएको छ । आज तारा एयरको विमानले सुनथराली विमानस्थलको परिक्षण उडान गरेको हो । पटक पटक औपाचारिक उद्घाटनका लागि मिति तय भएपनि स्थगित हुदै आएको उद्घाटन कार्यक्रम आगामी भोली अर्थात् सोमबार हुने पक्का भएपछि त्यसको एक दिन अघि परिक्षण उडान गरिएको हो ।
नरहरीनाथ गाउँपालिकाका प्रवक्ता तथा वडा नं ९ का वडा अध्यक्ष प्रदिप वोहोराले नेपाल सरकारका प्रधानमन्त्री पुष्पकमल दाहाल प्रचण्ड, संस्कृती पर्यटन तथा नागरिक उड्यानमन्त्री सुदन किराती सहित कर्णाली प्रदेश सरकारका मुख्यमन्त्री राजकुमार शर्मा, मन्त्रीहरुका साथै प्रतिनिधि सभा सदस्य र प्रदेश सभाका सदस्य सहितको टोली बिमानस्थाल उद्घाटनमा आउने भएकाले बिमानस्थलको अबस्था बुझ्न आज परिक्षण उडान भएको जानकारी दिनुभयो । सरकार प्रमुख सहितको टोली आउने भएकाले विमानस्थलको सुरक्षा अवस्था, कताबाट अवतरण गर्दा सहज र सुरक्षित हुन्छ भनेर परीक्षण गर्न तारा एयरको विमान प्राविधिक टोली सहित आएको हो । गाउँपालिका अध्यक्ष नगेन्द्रवहादुर बिष्टले प्राविधिकको भनाइ अनुसार विमानस्थल दबै तर्फबाट अवतरण गर्न सकिने बताउनुभयो । हामीले पहिलेदेखि चासो राखिराखेको विषय भएकाले पनि नागरिक उड्यान प्राधिकरणका इन्जिनियरहरुले पनि विमानस्थाल जनताबाट पनि अवतरण गर्न सकिने प्रतिक्रिया दिनुभएको र आज परीक्षण उडान पनि सहजै भएको बताउनुभयो । फागुन १४ गते भोली सोमबारका दिनमा कोटवाडामा आएर विमानस्थलको औपचारिक उद्घाटनमा सहभागी हुन आम नागरिकलाई पनि निम्तो गरेको अध्यक्ष विष्टको भनाइ छ ।
यसअघि औपाचारिक उद्घाटनका लागि चार पटकसम्म सूचना भएर स्थगित हुँदा नागरिक अझै पनि हुन्छ की हुदैन भन्नेमा थिए । तर आज परिक्षण उडान भएकाले अब विमानस्थाल उद्घाटन हुन्छ भन्नेमा सबै विश्वस्त भएका छन् । २०४२ सालमा तत्कालीन जिल्ला विकास समितिको निर्णय अनुसार सुरुमा एक लाख वजेट विनियोजन गरेर निमार्ण कार्य सुरु गरेको विमानस्थल ३८ वर्ष लगाएर निमार्ण सम्पन्न भएको थियो । निमार्ण सम्पन्न भएको एक वर्षसम्म औपचारिक उद्घाटनको पर्खाइमा छ । यो विमानस्थाल निमार्ण गर्दा संकटकालको समय २०५८ साल फागुन महिनामा सरकारी पक्षवाट धादिङ जोगिमाराका १७ जना मजदुर सहित ३५ जनाको सामुयिक हत्या भएको थियो ।
