काठमाडौँ । गृहमन्त्री रमेश लेखकले संविधानको रक्षा गर्दै सङ्घीय लोकतान्त्रिक गणतन्त्रात्मक शासन व्यवस्थाको सुदृढीकरण सरकारको मुख्य कार्यभार भएको बताउनुभएको छ । बिहीबार काठमाडौंमा आयोजित शान्ति, सुरक्षा तथा विपद् व्यवस्थापनसम्बन्धी अन्तर प्रदेशस्तरीय कार्यशाला गोष्ठीमा बोल्नुहुँदै मन्त्री लेखकले यस्तो बताउनुभएको हो । उहाँले संविधानलाई असफल बनउने छुट कसैलाई नभएको भनाइ राख्नुभयो । उहाँले नेपालमा ६८ वर्षको अवधीमा सात वटा संविधान बनेको स्मरण गरउँदै संविधान धेरै बन्नु राजनीतिक अस्थिरताको अदारहण भएको बताउनुभयो ।
‘‘हामीले संविधान बनाएका छौं । तुलनात्मक रुपमा हेर्दा यो संविधान अन्य देशका संविधानको तुलनामा असल छ । संसारभरका संविधानहरुलाई अध्ययन गरेर बनाएको हुनाले हाम्रो संविधान कान्छो र सफल हो । संविधानमा हामीले गणतन्त्र र संघीयताको विषयमा महत्त्वपूर्ण निर्णय गरेका छौं । हाम्रा नयाँ अभ्यासहरु प्रयोग भएका छन् ।,’’ मन्त्री लेखकले भन्नुभयो, ‘‘ यसरी नै हाम्रा लोकतान्त्रिक मूल्य मान्यताहरुलाई यो संविधानमा समावेश गरेका छौं । यो संविधानको रक्षा, सङ्घीय लोकतान्त्रिक गणतन्त्रात्मक शासन व्यवस्थाको सुदृढिकरण आजको मुख्य कार्यभार हो । मैले एउटा कुरा निरन्तर भन्ने गरेको छु, यो संविधानलाई असफल बनाउने छुट हामी कसैलाई छैन । किनभने नेपाल ६८ वर्षमा सात वटा संविधान बनेको देश हो ।’’
उहाँले संविधानलाई असफल बनाउन संविधान विरोधी गतिविधिहरु गर्ने र वर्तमान व्यवस्थालाई असफल सावित गर्ने प्रयत्न हुने गरेको उल्लेख गर्नुहुँदै त्यसका विरुद्ध कडा रुपले उभिन जरुरी रहेको बताउनुभयो । उहाँले भोतिक विकास निर्माण र आर्थिक वृद्धि गर्न नसक्दा जनतामा केही असन्तुष्टि रहेपनि संविधानकै कारण मुलुकमा समृद्ध बन्न नसकेको भाष्य निर्माण गर्ने दुष्प्रयास भइरहेको औंल्याउनुभयो । संविधान विरोधी गतिविधिहरु कुनैपनि हिसावले क्षम्य नहुने लेखकको भनाइ छ ।
‘‘संविधानलाई असफल बनाउन संविधान विरोधी गतिविधिहरु गर्ने र वर्तमान व्यवस्थालाई असफल सावित गर्न प्रयत्न गर्ने कोसिशहरु हुने गरेका छन् । त्यसका विरुद्ध हामी कडा रुपले उभिन जरुरी छ । केही कुराहरुमा समाधान गर्न नसक्दा नागरिकमा असन्तुष्टि भएपनि संविधानको कमजोरीका कारण मुलुकको विकास हुन नसकेको भन्ने भाष्य र गतिविधि भइरहेका छन् यस्ता गतिविधिहरु कुनैपनि हिसावले क्षम्य हुँदैनन् ।’’ उहाँले भन्नुभयो । उहाँले मुलुकमा साइबर अपराधका घटनाहरु बढिरहेको बताउनुभयो । उहाँले व्यक्तिगत चरित्रहत्या र समाजको शान्ति व्यवस्था खल्बल्याउने अपराधिक क्रियाकलापहरु बढेको उल्लेख गर्दै यसकाविरुद्ध सरकार निर्मम ढङ्गले प्रस्तुत हुने बताउनुभयो ।
गृहमन्त्री लेखकले भन्नुभयो, ‘‘पछिल्लो समय साइबर क्राइम बढिरेहको स्थिति छ । साइबर क्राइममा पनि खासगरी घृणात्मक अभिव्यक्तिहरु बढिरहेको पाइएको छ । कसैको व्यक्तिको चरित्र हत्या गरिदिने अथवा समाज समाजका बिचमा द्वन्द्व बढाउने, विषेश, भूगोल, धर्म र भाषाका बिचमा पनि विद्वेष फैलाउनले र समाजलाई गलत ढङ्गले प्रभावित पार्ने तरिकाले यो अपराध बढिरेहेको छ । यो अपराध नियन्त्रणका लागि पनि हामीले कुनै पनि खालको सम्झौता नगरेर निर्मम ढङ्गले प्रस्तुत हुन जरुरी छ ।’’ जनतालाई कानुनी राज्यको प्रत्याभुति दिलाउने सवालमा सरकारले कसैसँग सम्झौता नगर्ने उहाँको भनाइ छ ।
