काठमाडौँ । नेकपा (माओवादी केन्द्र) का वरिष्ठ उपाध्यक्ष नारायणकाजी श्रेष्ठले दुईदलीय व्यवस्था ल्याउनेगरी ठुला दलले बढाउन खोजेको थ्रेसहोल्डका सीमा गलत भएको बताउनुभएको छ । आज यहाँ आयोजित पत्रकार भेटघाट कार्यक्रममा उहाँले त्यस्तो बताउँदै संविधान संशोधनका लागि पनि सबै दलसँग परामर्श गरेर मात्र गर्न उहाँले दुई दलका नेतासँग आग्रह गर्नुभयो । वर्तमान सरकारले जनताका आधारभूत आवश्यकता पूरा गर्नमा ध्यान दिनुपर्ने उहाँको सुझाव छ ।
सबै जाति, वर्ग र क्षेत्रको पक्षमा, थप जनमुखी साथै निर्वाचित कार्यकारी राष्ट्रप्रमुख, पूर्ण समानुपातिक निर्वाचण प्रणाली हुनेगरी संविधान संशोधन गर्न माओवादी तयार रहेको उहाँले बताउनुभयो । उहाँले ताप्लेजुङको पाथीभरामा निर्माण गर्न लागेको केबुलकार योजनाका विषयमा गोली चल्नु दुःखद भएको टिप्पणी गर्नुभयो । स्थानीय समुदायको भावना र मागलाई सम्बोधन गरेर मात्र केबुलकार बनाउनुपर्ने उहाँको सुझाव छ । वार्ताको माध्यमबाट समस्याको समाधान गर्नुपर्ने उहाँले जोड दिनुभयो । नेता श्रेष्ठ बुधबार हुने माओवादी केन्द्र मैवाखोला गाउँपालिका कमिटीको तेस्रो अधिवेशन उद्घाटन गर्न ताप्लेजुङ आउनुभएको हो ।
