काठमाडौँ । उद्योग, वाणिज्य तथा आपूर्तिमन्त्री दामोदर भण्डारीले नेपालको शासकीय प्रणालीभित्रका प्रक्रियागत जटिलताको समाधान सरकारको पहिलो प्राथमिकतामा रहेको बताउनुभएको छ । आइतबार नेपाल उद्योग परिसङ्घले आयोजना गरेको महिला नेतृत्व शिखर सम्मेलनमा बोल्दै उहाँले यस्तो बताउनुभएको हो । उहाँले वर्तमान सरकारले आजका व्याप्त निराशा चिर्न नीतिगत सुधारका काम अघि बढाएको बताउनुभयो । उहाँले मुलुकमा रोजगारी सिर्जना गर्न, लगानी प्रवर्धन गर्न सरकारले काम गरिरहेको बताउनुभयो । उहाँले आजको राष्ट्रिय समस्यालाई सम्बोधन गर्नेकुरा सरकारको प्राथमिकतामा रहेको बताउनुभयो । उहाँले उद्योग र उद्यमशिलताको विकासबिना मुलुकको समृद्धि सम्भव नरहेको बताउनुभयो ।
मन्त्री भण्डारीले भन्नुभयो, ‘वर्तमान सरकारले आजका व्याप्त निराशा चिर्न पहिलो कुरा नेपालको शासकीय प्रणालीभित्र जुन प्रक्रियागत जटिलताले जकडिएको छ । त्यसलाई अन्त्य गरेर मुलुकमा रोजगारी सिर्जना गर्न, लगानी प्रवर्धन गर्न, आन्तरिक वा वाह्य लगानी प्रवर्धन गर्न हामी लागेका छौं । आजको राष्ट्रिय समस्यालाई सम्बोधन गर्नेकुरा सरकारको प्राथमिकता हो । नेपालको शासकीय प्रणालीभित्रका जटिलताको समाधान गर्नेकुरा पहिलो प्राथमिकतामा राखेर नीतिगत सुधारको मार्ग प्रशस्त गरेका छौँ । नेपालको उद्यमशिलतामा थुप्रै आशालाग्दा महिला दिदिबहिनीहरूले प्रयत्न गरिरहनुभएको छ ।’ उद्योग र उद्यमशिलताको विकास बिना मुलुकको समृद्धि सम्भव नभएको उहाँको भनाइ छ । त्यसका लागि वर्तमान सरकारले थुप्रै नीतिगत सुधारका कार्यक्रम अघि बढाएको उहाँले बताउनुभयो । मन्त्री भण्डारीले नेपालमा सार्वजनिक कार्यालयमा स्वदेशी वस्तुको उपयोग बढाउनेगरी सरकारले आफ्नो कार्यक्रमहरू अघि बढाएको बताउनुभयो ।
