काठमाडौँ । ग्रीन हाउसमा उत्पादन गरेको प्याजका बेर्ना बिक्रीबाट एक जना किसानले ६० हजार रुपियाँ आम्दानी गरेका छन् । पछिल्लो समय प्याज खेतीलाई व्यवसायीक रुपमा थालिएपछि प्याजको बेर्ना पनि आम्दानीको स्रोत बनेको हो । सिमकोट गाउँपालिका– ५ की अगुवा किसान गीता रोकायाले यस पटक प्याजका बेर्ना बिक्री गरेर ६० हजार आम्दानी भएको बताउनुभयो । उहाँले ग्रीन हाउसमा उत्पादन गरेको बेर्ना लगाउने समय भएपछि बिक्री सुरु गरिएको बताउनुभयो । बिगत तीन वर्षदेखि प्याजका बेर्ना उत्पादन गरेर बिक्री गर्दै आउनुभएको रोकायाको आम्दानीको स्रोत बेना समेत भएको छ ।
बेर्ना प्रति बोट एक रुपियाँ वा मुठ्ठाका एक सय रुपियाँमा बिक्री गर्ने गरेको जानकारी उहाँले दिनुभयो । जिल्लामा प्याजको व्यवसायीक खेती सुरु भएपछि बेर्ना बिक्री राम्रो हुन थालेको बताउनुहुँदै उहाँले आफुलाई राम्रो फाइदा भएको बताउनुभयो । उहाँले वर्षमा तीन लटमा प्याजका बेर्ना उत्पादन गर्दै आउनुभएको छ । रोकायाले कृषिसँग सम्बन्धित काम गर्ने निकायबाट तालिम लिएर तरकारी तथा फलफुल खेती गर्दै आउनुभएको छ । जिल्लामा प्याज खेती हुन थालेपछि बाहिरबाट प्याज आयातमा कमी समेत आउन थालेको छ ।
