काठमाडौँ – देशका विभिन्न भागमा मनसुन सक्रिय बन्दै जाँदा पछिल्लो १२ घण्टामा सिन्धुपाल्चोक, मकवानपुर र डोटीमा ठूलो पानी परेको छ। मौसम पूर्वानुमान महाशाखाका अनुसार सबैभन्दा धेरै पानी सिन्धुपाल्चोकमा मापन गरिएको छ।
महाशाखाको गोब्रे वर्षा मापन केन्द्रका अनुसार सिन्धुपाल्चोकमा ११८ मिलिमिटर वर्षा भएको छ। यसबाहेक, डोटीमा ६४.६ मिलिमिटर र मकवानपुरमा ६३.६ मिलिमिटर पानी परेको जानकारी दिइएको छ।
रातिको समयमा सोलुखुम्बु र पूर्वका केही जिल्लामा हल्कादेखि मध्यम वर्षा भएको बताइएको छ। तर, मधेश प्रदेशमा भने अझै वर्षा हुन सकेको छैन।
मौसमविद्हरूका अनुसार हाल मनसुनी वायुको प्रभाव कमजोर रहेको छ, जसका कारण केही क्षेत्रमा मात्र वर्षा भइरहेको छ।
आज दिउँसो पनि देशका केही स्थानमा हल्कादेखि मध्यम वर्षा हुन सक्ने सम्भावना रहेको महाशाखाले जनाएको छ। कोशी प्रदेशको तराई तथा मधेश प्रदेशका क्षेत्रमा हावाहुरी चल्न सक्ने सम्भावना रहेकाले सतर्क रहन अनुरोध गरिएको छ।
