काठमाडौं । राष्ट्रिय विपद् जोखिम न्यूनीकरण तथा व्यवस्थापन प्राधिकरणले कोशी, मधेश, बागमती, गण्डकी र लुम्बिनी प्रदेशका बासिन्दालाई असोज १७ गतेदेखि २० गतेसम्म अत्यावश्यक काम बाहेक लामो यात्रा नगर्न आग्रह गरेको छ। जल तथा मौसम विज्ञान विभागले ती प्रदेशका विभिन्न जिल्लामा लगातार भारी वर्षा हुने पूर्वानुमान गरेकाले नदी तथा खोला–खालामा आकस्मिक बहाव बढ्ने, पहिरो र डुबानको जोखिम उच्च रहने चेतावनी दिइएको हो। विशेषगरी बागमती, कमला र कोशी नदीमा पानीको बहाव खतरा तहमा पुग्न सक्ने भएकाले स्थानीयवासीलाई सतर्क रहन, राति वा दुर्गम स्थानतर्फ यात्रा नगर्न, डुबान वा पहिरोको जोखिम भएका बस्तीका बासिन्दाले सुरक्षित र अग्लो स्थानमा बस्न तयार रहन र आवश्यक परे तत्काल स्थानान्तरण गर्न प्राधिकरणले आह्वान गरेको छ। साथै जिल्ला विपद् व्यवस्थापन समितिहरूले बाटो र मौसमको अवस्थाअनुसार सवारी आवागमन रोक्ने वा सञ्चालन गर्ने निर्णय गर्ने भएकाले त्यसलाई पालना गर्न सबैलाई अनुरोध गरिएको छ। तीनवटै सुरक्षा निकाय, स्थानीय तह, स्वयंसेवक तथा सरोकारवाला संस्थालाई प्रतिकार्यका लागि सतर्क अवस्थामा रहन, जोखिमयुक्त सडकमा तुरुन्त प्रयोग गर्न डोजर, एक्साभेटर, लोडरजस्ता उपकरण तयारी अवस्थामा राख्न समेत निर्देशन दिइएको प्राधिकरणले जनाएको छ।
