काठमाडौं । जल तथा मौसम विज्ञान विभाग र राष्ट्रिय विपद् जोखिम न्यूनीकरण तथा व्यवस्थापन प्राधिकरणबाट प्राप्त जानकारीअनुसार असोज १८ देखि २० गतेसम्म देशका विभिन्न स्थानमा भारीदेखि अति भारी वर्षा हुने सम्भावना रहेकाले नेपाल सरकारले असोज १९ र २० गते ९आइतबार र सोमबार० देशभर सार्वजनिक बिदा दिने निर्णय गरेको छ।
गृह मन्त्रालयले शनिबार विज्ञप्ति जारी गर्दै बिदाको घोषणा गरेको हो। मन्त्रालयका अनुसार हाल देशका विभिन्न भागमा वर्षा भइरहेको र आगामी दुई दिन अझै ठूलो मात्रामा वर्षा हुने पूर्वानुमान भएकाले विपद् जोखिम न्यूनीकरणका दृष्टिले सतर्कता अपनाउनु आवश्यक देखिएको छ।
सार्वजनिक बिदा अत्यावश्यक सेवा सञ्चालनमा खटिने कार्यालयहरूबाहेक सबै सरकारी, सार्वजनिक तथा शिक्षण संस्थाहरूमा लागू हुनेछ।
मन्त्रालयका प्रवक्ता सहसचिव आनन्द काफ्लेले जारी गर्नुभएको सूचनामा भनिएको छ— “अत्यावश्यक काम नपरी घर बाहिर ननिस्कनुहुन र सुरक्षित स्थानमा बस्न सबै नागरिकसँग अनुरोध छ।”
वर्षाका कारण बाढी, डुबान, भू–क्षय, पहिरो जस्ता घटनाको सम्भावना रहेकाले विशेषगरी नदी किनार, पहाडी भू–भाग र जोखिमयुक्त स्थानमा सतर्कता अपनाउन भनिएको छ। साथै सडक तथा हवाई यातायातसमेत प्रभावित हुन सक्ने सम्भावना मन्त्रालयले जनाएको छ।
यसअघि मौसम विभागले पश्चिम र मध्य तराई, बागमती, गण्डकी र कर्णाली प्रदेशका केही स्थानहरूमा अति भारी वर्षा हुन सक्ने पूर्वानुमान गरेको थियो।
सरकारले सम्भावित मानवीय तथा भौतिक क्षति न्यूनीकरणका लागि सतर्कता अपनाउन सबै स्थानीय तह, सुरक्षा निकाय, तथा सम्बन्धित कार्यालयहरूलाई तयारी अवस्थामा रहन आग्रह गरेको छ।
नागरिकहरूलाई पनि अनावश्यक यात्रा नगर्न, सुरक्षित स्थानमा बस्न र सरकार तथा सम्बन्धित निकायबाट जारी सूचना नियमित रूपमा फलो गर्न आग्रह गरिएको छ।
