काठमाडौँ । सुनसरीको सोनापुरस्थित नेपालकै सबैभन्दा ठूलो जुट उद्योग ‘अरिहन्त मल्टी फाइबर्स लिमिटेड’ डुबानमा परेको छ। लगातारको वर्षापछि ट्याङ्ग्रा खोलामा आएको बाढी उद्योग परिसरमा पस्दा जुटमिल पूर्ण रूपमा प्रभावित भएको हो।
उद्योगका प्रमुख कार्यकारी अधिकृत गोविन्द बजगाईंका अनुसार डुबानका कारण तयार जुट सामग्री, कच्चा पदार्थ र मेशिनरी उपकरणहरू सबैजसो नष्ट भएका छन्। प्रारम्भिक अनुमानअनुसार उद्योगलाई २० करोड रुपैयाँभन्दा बढीको क्षति पुगेको छ।
करीब ५ हजार मजदुर कार्यरत यस उद्योगमा तीन सिफ्टमा २४ सैं घण्टा उत्पादन चल्ने गरे पनि अहिले डुबानका कारण सम्पूर्ण काम बन्द भएको छ।
सुनसरी–मोरङ औद्योगिक कोरिडरमा अवस्थित अरिहन्त जुटमिलसँगै आसपासका साना उद्योग र बस्तीहरू पनि डुबानमा परेका छन्। यसले त्यहाँको जनजीवनमा प्रत्यक्ष असर परेको छ।
