काठमाडौं । देशभर सक्रिय मनसुनले विभिन्न स्थानमा बाढी, पहिरो र डुबानका घटना निम्त्याए पनि चितवनमा भने यसपालि कुनै मानवीय क्षति नभएको जिल्ला प्रशासन कार्यालयले जनाएको छ।
प्रमुख जिल्ला अधिकारी (प्रजिअ) गणेश अर्यालका अनुसार समयमै सतर्कता अपनाइएकाले सम्भावित जोखिमबाट जनधनको क्षति हुन दिइएन। विशेषगरी नारायणी र राप्ती नदी आसपास उच्च जोखिम रहे पनि पूर्वतयारी र सतर्कता अपनाउँदा स्थिति नियन्त्रणमा राख्न सकिएको हो।
असोज ३ गते तुइन खोलामा आएको ठूलो पहिरोका कारण ५६ घण्टासम्म सवारी आवागमन रोकिएको थियो। पहिरो हटाएपछि सवारी सञ्चालन पुनः सुरु गरिएको प्रजिअ अर्यालले जानकारी दिनुभयो। यात्रुहरूलाई निःशुल्क खाना, स्वास्थ्य सेवा तथा वैकल्पिक व्यवस्थासमेत गरिएको थियो।
यस्तै, असोज १८ गतेदेखि परेको अविरल वर्षापछि जोखिमयुक्त स्थानहरूमा सवारी सञ्चालन रातको समयका लागि पूर्णरूपमा बन्द गरिएको थियो। प्रभावित यात्रुहरूलाई भरतपुर, नारायणगढ र सौराहाका होटलहरूमा ७५ प्रतिशत छुटमा बस्ने व्यवस्था गरिएको थियो।
जिल्ला सुरक्षा समितिको निर्णयलाई पूर्ण रूपमा कार्यान्वयन गर्न सकेको र तयारी अवस्थामा रहेका निकायबीचको समन्वय सशक्त रहेको प्रजिअ अर्यालले बताउनुभयो। यसले सम्भावित क्षति न्यूनीकरणमा प्रभावकारी भूमिका खेलेको हो।
