काठमाडौं । इलाममा गए राति परेको अविरल वर्षासँगैको बाढी र पहिरोले अहिलेसम्म ३७ जनाको ज्यान लिएको छ भने ४ जना अझै बेपत्ता रहेका छन्।
प्रमुख जिल्ला अधिकारी (प्रजिअ) सुनिता नेपालका अनुसार मृतकहरू सूर्योडय नगरपालिका–५ मा ५ जना, इलाम नगरपालिका–६ मा ६ जना, सन्दकपुर गाउँपालिकामा ६ जना, माङसेबुङमा ३ जना, देउमाई नगरपालिकामा ८ जना, माइजोगमाई गाउँपालिकामा ८ जना र फाकफोकथुम गाउँपालिकामा १ जना छन्।
साथै, सन्दकपुरमा २ जना, माइजोगमाईमा १ जना र इलाम नगरपालिका–६ मा १ जना गरी ४ जना बेपत्ता भएको जनाइएको छ।
मृतकमध्ये ११ जनाको पोस्टमार्टम भइसकेको छ भने बाँकीको उद्धार तथा शव परीक्षणका लागि इलाम अस्पताल ल्याइँदैछ। खोज, उद्धार र राहत कार्यमा सुरक्षाकर्मी तथा स्थानीयवासी परिचालित छन्।
