काठमाडौं । अविरल वर्षासँगै देशभर विभिन्न स्थानमा गएको बाढी र पहिरोका कारण हालसम्म ४९ जनाको ज्यान गएको छ भने ७ जना अझै बेपत्ता रहेका छन्।
सशस्त्र प्रहरीका अनुसार अहिलेसम्मको उद्धार तथा जानकारी अपडेटअनुसार इलाममा सबैभन्दा बढी ३७ जनाको मृत्यु भएको छ। त्यस्तै, पाँचथरमा ६, रौतहटमा ३, उदयपुरमा २, खोटाङमा १ जनाको ज्यान गएको छ।
बेपत्ता हुनेमा रसुवामा ४, इलाम, बारा र काठमाडौंमा एक–एक जना रहेका छन्। सशस्त्र प्रहरीका डिएसपी तथा सहप्रवक्ता शैलेन्द्र थापाले उद्धार कार्य जारी रहेकाले मृतकको संख्या अझै बढ्न सक्ने जानकारी दिनुभयो।
यस्तै, विभिन्न जिल्लामा २० जना घाइते भएका छन्। इलाममा ७, पाँचथरमा ६, खोटाङमा ३, भोजपुरमा २, उदयपुर र मकवानपुरमा १–१ जना घाइते भएको सशस्त्र प्रहरीले जनाएको छ।
सुरक्षाकर्मी, स्थानीय प्रशासन र उद्धार टोलीहरू प्रभावित क्षेत्रहरूमा खटिइरहेका छन् भने जोखिमयुक्त स्थानमा सर्वसाधारणलाई सतर्कता अपनाउन आग्रह गरिएको छ।
