काठमाडौं । चार महिनासम्म तलब नपाएको भन्दै सप्तरीको खडक नगरपालिकाका शिक्षकहरूले बुधबार नगरपालिका कार्यालयमा तालाबन्दी गरेका छन्।
महान चाड दशैंको मुखमा समेत तलब नपाएकोमा आक्रोशित शिक्षकहरूले कल्याणपुरस्थित नगर कार्यालयमा तालाबन्दी गर्दै विरोध प्रदर्शन गरेका हुन्। शिक्षक कुलानन्द साहका अनुसार तलब वितरणका लागि कार्यपालिकाले निर्णय गरिसकेको भए पनि कार्यान्वयन नहुँदा शिक्षकहरू आन्दोलनमा उत्रन बाध्य भएका हुन्। “भोकै पेट काम गर्न सकिन्न, त्यसैले हामीले तालाबन्दीसहित पठनपाठन ठप्प पार्ने निर्णय गरेका छौं,” उनले बताए।
अर्का शिक्षक शैलेन्द्र कुमार चौधरीले चार महिनासम्मको तलब रोकिएपछि दैनिक जीवन सञ्चालन गर्नसमेत गाह्रो भएको बताउँदै आन्दोलनमा सामेल हुनुपरेको दुःखेसो पोखेका छन्।
तालाबन्दीपछि जारी गरिएको संयुक्त विज्ञप्तिमा धर्मराज सिंहसहित १५ जना शिक्षकको हस्ताक्षर रहेको छ।
यता खडक नगरपालिकाका प्रमुख प्रशासकीय अधिकृत विनय कुमार सोनुले नगरप्रमुख जयप्रकाश चौधरीबाट तलब वितरणका लागि आवश्यक अख्तियारी प्राप्त नभएकाले तलब खुवाउन नसकिएको स्पष्ट पारेका छन्।
“नगरसभाबाट निर्णय भइसकेको र कार्यपालिका बैठकबाट पनि असोज २ गते तलब दिने निर्णय भएको थियो, तर नगरप्रमुखले अझै अख्तियारी दिनुभएको छैन,” उनले भने।
