काठमाडौ — सिन्धुली जिल्लाको गोलन्जोर गाउँपालिका–१ स्थित च्याउटारबेसीमा पहिरोका कारण १५ घरपरिवार उच्च जोखिममा परेका छन्।
असोज १७ र १८ गतेको अविरल वर्षापछि माथिबाट खसेको पहिरोले बस्तीमा क्षति पुर्याएको हो। असोज १८ गते बिहान गएको पहिरोले निरबहादुर पाण्डेको गोठ र शौचालय भत्किएर क्षति भएको गाउँपालिकाले जनाएको छ।
साथै कुन्जरमणि बराल, ज्वालाप्रसाद न्यौपाने, ठाकुरप्रसाद न्यौपाने, सुरेस न्यौपाने, सुरेन्द्र न्यौपाने र शान्तिप्रसाद न्यौपाने लगायतका घरपरिवार पहिरोको प्रत्यक्ष जोखिममा परेका छन्।
पीडित तथा गाउँपालिका उपाध्यक्ष ज्वालाप्रसाद न्यौपानेका अनुसार पहिरोमाथिबाट खसेको ठूलो ढुंगा र भूस्खलनले पूरा बस्ती नै संकटमा परेको छ। “राति सुरक्षित ठाउँ खोज्दै सर्नुपर्छ, तर दिउँसो भने आफ्नै घर फर्केर बस्नुपरेको अवस्था छ,” उहाँले भन्नुभयो।
गाउँपालिकाले पहिरो रोकथाम र ढुंगा व्यवस्थापनका लागि आवश्यक पहल गरिरहेको बताउँदै उपाध्यक्ष न्यौपानेले जिल्ला विपद् व्यवस्थापन समितिलाई पनि औपचारिक जानकारी दिइसकेको जानकारी दिनुभयो।
यसैबीच, प्रमुख जिल्ला अधिकारी दिनेशसागर भुसालले पहिरो पीडित बस्तीको सुरक्षाका लागि जिल्ला विपद् व्यवस्थापन समितिको बैठकबाट नेपाली सेनालाई अनुरोध गर्ने निर्णय भइसकेको जानकारी दिनुभयो।
उहाँले थप भन्नुभयो, “नेपाल प्रहरी, सशस्त्र प्रहरी बल नेपालसँग पनि ठूलो चट्टान हटाउने र बस्ती जोगाउने विषयमा समन्वय भइरहेको छ।”
