काठमाडौं — कास्की कारागारबाट भदौ २४ गते जेनजी आन्दोलनका क्रममा भागेका कैदीमध्ये २ सय ८७ जना अझै फरार रहेको कारागार प्रशासनले जनाएको छ।
कारागारका प्रमुख राजेन्द्र शर्माका अनुसार उक्त दिन ७७३ जना कैदीबन्दी कारागारबाट भागेका थिए। तीमध्ये केही आफैँ फर्किएका छन् भने केहीलाई प्रहरीले अन्य जिल्लाबाट पक्राउ गरेको छ। तर २८७ जना अझै पनि सम्पर्कविहीन छन्।
कारागार प्रशासनले भागेका कैदीबन्दीलाई असोज २० गतेसम्म स्वेच्छाले फर्कन समय दिएको थियो। तर तोकिएको समयसम्म नफर्केकाहरूको खोजी कार्य तीव्र पारिएको छ।
प्रशासनले प्रचलित कानुनअनुसार कारबाही प्रक्रिया अघि बढाइने जनाएको छ। साथै, फरार कैदीलाई लुकाउने, आश्रय दिने वा सहयोग गर्ने जो-कोहीलाई पनि कानुनी दायरामा ल्याइने चेतावनी दिइएको छ।
कारागार प्रमुख शर्माका अनुसार, हालसम्म केही कैदी आफैँ आत्मसमर्पण गरेर फर्किएका छन् भने प्रहरीले भाग्दाको क्रममा केहीलाई पक्राउ समेत गरेको छ।
