काठमाडौं, असोज ३० – मधेश प्रदेशका नवनियुक्त मुख्यमन्त्री जितेन्द्रप्रसाद सोनलले पद तथा गोपनीयताको शपथ लिनुभएको छ। जनकपुरधामस्थित प्रदेश प्रमुखको कार्यालयमा आज आयोजित विशेष समारोहमा मुख्यमन्त्री सोनलले भोजपुरी भाषामा शपथ लिनुभएको हो।
लोकतान्त्रिक समाजवादी पार्टी (लोसपा) नेपालका प्रदेशसभा सदस्य सोनललाई प्रदेश प्रमुख सुमित्रा सुवेदी भण्डारीले नेपालको संविधानको धारा १६८ को उपधारा (२) बमोजिम मुख्यमन्त्रीमा नियुक्त गर्नुभएको थियो। उहाँले बुधबार साँझ पाँच दलका ५६ जना प्रदेशसभा सदस्यको समर्थनका आधारमा सोनललाई मुख्यमन्त्री नियुक्त गर्नुभएको हो।
