काठमाडौं,कात्तिक २ — दीपावलीका लागि झालरबत्ती (झिलिमिली बत्ती) जडान गर्ने क्रममा करेन्ट लागेर वीरगञ्जमा एक किशोरको ज्यान गएको छ।
वीरगञ्ज महानगरपालिका वडा नम्बर १, छपकैयाका १७ वर्षीय पीयूष साहको शनिबार साँझ करेन्ट लागेर मृत्यु भएको हो।
प्रहरी निरीक्षक निरोज चौलागाईंका अनुसार साँझ करिब ६ बजे पीयूष आफ्नै घरमा दीपावलीका लागि झालरबत्ती जडान गर्दै थिए। सोही क्रममा अचानक विद्युत प्रवाह हुँदा उनी गम्भीर घाइते भएका थिए।
अचेत अवस्थामा रहेका उनलाई तत्काल नारायणी अस्पताल पुर्याइए पनि त्यहाँ उपचार सम्भव नभएपछि नेशनल मेडिकल कलेज लैजाँदै गर्दा बाटोमै मृत्यु भएको प्रहरीले जनाएको छ।
छपकैया बजार निवासी लालु साह तेलीका छोरा पीयूषको असमय निधनले दीपावलीको उत्सवमय वातावरण शोकमा परिणत भएको छ।
प्रहरीले यस्तो दुःखद घटना पुनः नदोहोरियोस् भन्नका लागि बत्ती जडान गर्दा विशेष सावधानी अपनाउन सर्वसाधारणलाई आग्रह गरेको छ।
