काठमाडौं , तनहुँ कारागारबाट गत भदौ २४ गते जेनजी आन्दोलनको उपस्थिति लाभ उठाउँदै भागेका दुई जना कैदीबन्दीलाई जिल्ला प्रहरी कार्यालय लमजुङले पक्राउ गरेको छ। पक्राउ पर्नेमा नवलपरासी–४ सुस्ता निवासी ३९ वर्षीय सन्तोष गुरुङ र बेंसीसहर–३ रानीकुवा निवासी ४५ वर्षीय विनोद गुरुङ रहेका छन्।
सन्तोष चोरी मुद्दामा र विनोद जवरजस्ती करणीको आरोपमा कारागार चलान भएका थिए। पक्राउ परेका दुबैलाई तत्काल दमौली कारागार तनहुँमा बुझाइएको प्रहरीले जनाएको छ।
लमजुङ कारागारको पर्खाल भत्किएपछि १०८ कैदीबन्दीलाई कास्की र तनहुँ कारागारमा स्थानान्तरण गरिएको थियो। त्यही मौका छोपेर भदौ २४ गते कास्की र तनहुँबाट कैदीबन्दीहरू भागेका थिए। अहिलेसम्म फरार भएका मध्ये ४५ जनालाई पक्राउ गरी कारागारमा फिर्ता लगिएको छ भने २७ जना अझै फरार रहेको प्रहरीले जानकारी दिएको छ।
प्रहरी प्रमुख रेशम बोहोराले भने, “फरार कैदीबन्दीहरूलाई छिट्टै नियन्त्रणमा ल्याउन तीव्र खोजी गरिरहेका छौं। उनीहरूको घर र आफन्तको निगरानीमा राखिएको छ। कतिपय पक्राउ परेकाहरू आफै कारागार सम्पर्कमा आएका छन् भने केही घरमा लुकीछिपी बसेका थिए।”
कसैले कारागारबाट छुट पाए पनि धेरै फरार कैदीबन्दी अझै खोजीको प्रक्रियामा रहेको बताइएको छ।
