काठमाडौं , वैदेशिक रोजगारीका लागि पोर्चुगल पुगेका एक नेपाली युवा बेपत्ता भएका छन्। तनहुँ जिल्ला भानु नगरपालिका–९ पिपलपानीका ३४ वर्षीय जितेन्द्र पाण्डे करिब दुई वर्षदेखि पोर्चुगलमा बस्दै आएका थिए। उनी गत सोमबारदेखि राजधानी लिस्बन नजिकैको सिन्ट्रा क्षेत्रमा सम्पर्कविहीन भएका छन्।
पाण्डेका साथी विदुर तामाङले जानकारी दिएअनुसार, गत आइतबार राति तामाङको घरमा आएपछि पाण्डे साथीको फोन लिएर गएको थियो र त्यसपछि सम्पर्क गुमाएको हो। सोमबार काममा उपस्थित नभएपछि खोजी सुरु गरिएको थियो। तामाङका अनुसार, पाण्डेले परिवारलाई केही दिन सम्पर्क नहुने भनेको जानकारी दिएको थियो, तर त्यसपछि कसैसँग सम्पर्क नभएको छ।
पाण्डेको खोजीका लागि पोर्चुगलमा स्थानीय प्रहरीलाई खबर गरिएको छ भने नेपालस्थित परिवारलाई पनि जानकारी गराइएको छ। बेपत्ता पाण्डेको रेसिडेन्सी कार्ड, बैंक कार्ड, राहदानी लगायतका सबै सामान उनको बस्ने कोठामा फेला परेको छ।
पाण्डे सिन्ट्रास्थित एक प्याकिङ कम्पनीमा कार्यरत थिए र दुई वर्षअघि क्रोएसियाबाट पोर्चुगल आएका थिए। पोर्चुगलस्थित नेपाली दूतावासले पनि उनको खोजीका लागि प्रहरी प्रशासनसँग समन्वय गर्दै सक्दो पहल गरिरहेको छ।
