काठमाडौं , कात्तिक २ — कैलालीमा मलामी बोकेको ट्याक्टर दुर्घटना हुँदा तीन जनाको मृत्यु भएको छ भने नौ जना घाइते भएका छन्।
बर्दगोरिया गाउँपालिका–४ बाट चिसापानीतर्फ जाँदै गरेको सुदूरपश्चिम प्रदेश ०१००२ त ४९५१ नम्बरको ट्याक्टर लम्कीचुहा नगरपालिका अन्तर्गत पर्ने धोबेनी खोलामा अनियन्त्रित भई पल्टिएको हो।
इलाका प्रहरी कार्यालय लम्कीका प्रमुख प्रहरी निरीक्षक लोकेन्द्रबहादुर सिंहका अनुसार घटनास्थलमै ज्यान गुमाउनेमा बर्दगोरिया–४ का ६४ वर्षीय दानबहादुर साउद, ३४ वर्षीय हर्क साउद, र १६ वर्षीय शीतल साउद छन्।
घटनामा घाइते भएका ९ जनालाई स्थानीयवासी र सुरक्षाकर्मीको सहयोगमा उद्धार गरी लम्कीस्थित लालरत्न अस्पतालमा उपचारका लागि लगिएको प्रहरीले जनाएको छ।
ट्याक्टरमा कति जना सवार थिए भन्नेबारेमा विस्तृत विवरण आउन बाँकी रहे पनि दुर्घटनाको कारण र अन्य विवरणबारे थप अनुसन्धान भइरहेको इलाका प्रहरी कार्यालय लम्कीले जनाएको छ।
