काठमाण्डौ, कात्तिक ४
सप्तरीको राजविराज नगरपालिका क्षेत्रमा एक किशोरीमाथि जबरजस्ती करणीको प्रयास भएको घटना सार्वजनिक भएको छ।
सोमबार राति करिब ८ बजे पसलबाट घर फर्किंदै गर्दा दुई युवकले ती नाबालिकामाथि जबरजस्ती गर्ने प्रयास गरेका थिए। प्रतिरोध गर्ने क्रममा किशोरीको टाउको र शरीरका विभिन्न भागमा चोटपटक लागेको र तत्कालै राजविराजस्थित एक अस्पतालमा उपचार गरिएको प्रहरीले जनाएको छ। हाल उनकी स्वास्थ्य अवस्था सामान्य रहेको छ।
घटनामा संलग्नमध्ये एक २० वर्षीय युवकलाई प्रहरीले पक्राउ गरेको छ भने १९ वर्षीय अर्का युवक फरार रहेका छन्। फरार युवकको खोजी भइरहेको छ।
जिल्ला प्रहरी कार्यालय सप्तरीका प्रहरी नायब उपरीक्षक डम्बर बहादुर पुरीले घटनाबारे विस्तृत अनुसन्धान जारी रहेको जानकारी दिनुभयो। उहाँका अनुसार, किशोरी र उनका अभिभावकसँग थप बुझ्ने कार्य भइरहेकोले यो जबरजस्ती करणीको प्रयास हो कि होइन भन्ने कुरामा हाल पुष्टि भइसकेको छैन।
