काठमाडौं, कात्तिक ४
रौतहटमा ठूलो परिमाणमा लागुऔषधसहित एक वृद्ध महिला पक्राउ परेकी छन्। पक्राउ पर्नेमा म्याग्दी जिल्लाको बेनी नगरपालिका–९ फुलचौरकी ६० वर्षीया दिलमाया विक रहेको जिल्ला प्रहरी कार्यालय रौतहटले जनाएको छ।
प्रहरीका अनुसार सोमबार अपराह्न करिब ४ बजे गौरबाट चन्द्रनिगाहपुरतर्फ जाँदै गरेको ना ५ ख ५०६३ नम्बरको यात्रुबाहक बसलाई यमुनामाई गाउँपालिका–५ स्थित बमनहरमा चेकजाँच गर्ने क्रममा विकलाई शंका लागि खोजतलास गर्दा ठूलो परिमाणमा लागुऔषध फेला परेको हो।
प्रहरीले विकको साथबाट फेनागन ४९८ थान, डाइजोपाम ४९१ थान, नूफिन ४०० थान र बुप्रेनोर्फिन १०० थान फेला पारेको जनाएको छ। कुल १,४८९ थान लागुऔषध बरामद गरिएको जिल्ला प्रहरी कार्यालय रौतहटका प्रवक्ता, प्रहरी नायब उपरीक्षक (डीएसपी) राजु कार्कीले जानकारी दिए।
विकलाई नियन्त्रणमा लिएर आवश्यक अनुसन्धान भइरहेको प्रहरीले जनाएको छ।
