काठमाडौं, कात्तिक ४
पाल्पाको माथागढी गाउँपालिका–४, देउगीरमा एक वृद्ध महिलाको कुटपिटबाट हत्या भएको छ। ६७ वर्षीया फूलमाया जिसीको गएराति कुटपिटबाट मृत्यु भएको जिल्ला प्रहरी कार्यालय पाल्पाले जनाएको छ।
प्रहरीका अनुसार स्थानीय ३७ वर्षीय मिनबहादुर विश्वकर्माले राति करिब १२ बजेतिर जिसी दम्पतीमाथि कुटपिट गरेका थिए। घटनास्थलमै फूलमायाको ज्यान गएको सूचना अधिकारी होमप्रकाश चौधरीले जानकारी दिए।
कुटपिटबाट फूलमायाका ८२ वर्षीय श्रीमान् प्रेमबहादुर जिसी गम्भीर घाइते भएका छन्। प्रारम्भिक उपचारपछि उनलाई तानसेनस्थित लुम्बिनी मेडिकल कलेजबाट थप उपचारका लागि लुम्बिनी सिटी अस्पताल बुटवल पठाइएको छ।
घटनापछि भागेर आफ्नै घरमा लुकेका आरोपी विश्वकर्मालाई प्रहरीले नियन्त्रणमा लिएको छ। उनलाई पक्राउ गरी थप अनुसन्धान थालिएको प्रहरीले जनाएको छ।
