काठमाडौं, कात्तिक ४
प्रधानमन्त्री सुशीला कार्कीले विघटित प्रतिनिधिसभामा प्रतिनिधित्व गरेका राष्ट्रिय मान्यता प्राप्त सात राजनीतिक दलसँग आगामी फागुन २१ गते हुने निर्वाचनबारे छलफल गर्न मङ्गलबार भेटवार्ता गर्ने कार्यक्रम रहेको छ।
प्रधानमन्त्री निवास बालुवाटारमा आज अपराह्न ४ बजे प्रधानमन्त्री कार्कीले सात दलका प्रतिनिधिसँग सम्वाद गर्न लाग्नुभएको हो, प्रधानमन्त्रीका प्रेस संयोजक राम रावलले जानकारी दिनुभयो।
छलफलका लागि तत्कालीन संसदमा मान्यता प्राप्त ती सात दलबाट दुई–दुई जना उच्चस्तरीय प्रतिनिधि पठाउन अनुरोध गरिएको छ।
नेपाली कांग्रेस, नेपाल कम्युनिष्ट पार्टी (एमाले), नेकपा (माओवादी केन्द्र), राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनमत पार्टी र जसपा नेपाल पार्टीका प्रतिनिधिहरूलाई छलफलमा सहभागी गराउने तयारी गरिएको छ।
