काठमाडौं, कात्तिक ४
नेपाली कांग्रेसका कार्यवाहक सभापति पूर्णबहादुर खड्काले सरकारले निर्वाचनका लागि आवश्यक वातावरण तयार गरेमा पार्टी सहभागी हुने स्पष्ट गर्नुभएको छ।
मंगलबार सुर्खेतमा पूर्व सभापति गोविन्दबहादुर मल्लको १३औं पुण्यतिथिमा आयोजित श्रद्धाञ्जली सभामा बोल्दै खड्काले भन्नुभयो, “चुनावका लागि आवश्यक पूर्वाधार र वातावरण तयार भएमा नेपाली कांग्रेस लोकतान्त्रिक पार्टीका रूपमा सहभागिता जनाउन तयार छ। तर अहिलेसम्म सरकारले चुनाव गराउने किसिमको कुनै तयारी गरेको देखिँदैन।”
उहाँले सरकारप्रति प्रश्न उठाउँदै जनजी आन्दोलनको क्रममा लुटिएका हतियार फिर्ता गर्ने, प्रहरी तथा सुरक्षा निकायको मनोबल बढाउने, चुनावमा भाग लिने सबै दललाई विश्वासमा लिने र आम मतदातालाई सुरक्षा प्रत्याभूति दिने काम सरकारले गर्नुपर्ने बताउनुभयो।
खड्काले वर्तमान सरकार चुनावी तयारीभन्दा पनि विपक्षी दलका नेताहरूविरुद्ध पूर्वाग्रही ढंगमा आरोप लगाउने र भ्रम सिर्जना गर्नमै केन्द्रित रहेको आरोप पनि लगाउनुभयो। “हामी कानुनी प्रक्रिया अनुसार हुने छानबिनका लागि सधैं तयार छौं,” उहाँले भन्नुभयो, “तर सरकारकै जिम्मेवार व्यक्तिबाट अनावश्यक लाल्छना र भ्रम सिर्जना भइरहेको छ, जुन दुःखद हो।”
कार्यवाहक सभापति खड्काले पार्टीको केन्द्रीय कार्यसमिति बैठकले आसन्न चुनाव, पार्टी अधिवेशन र वर्तमान राजनीतिक परिस्थिति सम्बन्धी आधिकारिक निर्णय लिने पनि जानकारी दिनुभयो।
