काठमाडौँ — यो साता सुनको मूल्यमा निरन्तर गिरावट आएको छ । अन्तर्राष्ट्रिय बजारमा भाउ घटेसँगै नेपाली बजारमा पनि पछिल्ला चार दिनदेखि सुनको मूल्य लगातार ओरालो लागेको नेपाल सुनचाँदी व्यवसायी महासङ्घले जनाएको छ ।
गत आइतबार एकैदिन प्रतितोला ११ हजार ६०० रुपियाँले घट्दै सुनको मूल्य दुई लाख ४१ हजार नौ सयमा झरेको थियो । त्यसपछि सोमबार पुनः तोलामा दुई हजार घटेर दुई लाख ३९ हजार नौ सयमा कारोबार भयो । हिजो मङ्गलबार प्रतितोला दुई हजार नौ सयले घटेपछि सुन दुई लाख ३७ हजारमा पुगेको थियो भने बुधबार थप सात सय घटेर दुई लाख ३६ हजार तीन सय रुपियाँमा झरेको छ ।
यसैबीच, चाँदीको मूल्य भने केही बढेको छ । मङ्गलबार प्रतितोला दुई हजार ९२० मा कारोबार भएको चाँदी आज बढेर दुई हजार ९६५ रुपियाँमा पुगेको महासङ्घले जनाएको छ ।
अन्तर्राष्ट्रिय बजारमा आज सुन प्रतिऔंस करिब तीन हजार ९६० अमेरिकी डलर हाराहारीमा कारोबार भइरहेको छ । विशेषज्ञहरूले अमेरिकी अर्थतन्त्रका तथ्याङ्क र मध्यपूर्वीय तनावमा आएको सुधारका कारण लगानीकर्ताको आकर्षण घटेपछि सुनको मूल्य घटिरहेको विश्लेषण गरेका छन् ।
