काठमाडौं । गुल्मीको सदरमुकाम तम्घासमा गाउँका कुकुर आउने र गाउँ नजाने भएपछि व्यवस्थापनमा थप चुनौती देखापरेको छ । रेसुङ्गा नगरपालिका, पशुसेवा शाखाका हिक्मतसिंह महराका अनुसार गाउँबाट तम्घासमा भुस्याहा कुकुरहरु आउने र उनीहरुले बच्चा जन्माउने भएका कारण व्यवस्थापनमा थप चुनौती देखापरेको बताउनुभयो । नगरभित्र रहेका भुस्याहा कुकुरहरुलाई स्थायी बन्ध्याकरण गर्दै आएपनि गाउँबाट आउने कुकुरहरुको सङ्ख्यामा वृद्धि भएका कारण थप ब्यवस्थापनमा समस्या भएको उहाँको भनाइ छ । गाउँबाट सदरमुकाम तम्घासमा बजार गर्न आउने व्यक्तिहरुसँगै कुकुर आउने र सदरमुकाममै रहने भएका कारण भुस्याहा कुकुर वृद्धि भएको महराले बताउनुभयो ।
सदरमुकाम तम्घासमा व्यापार गर्दै आउनुभएका जनक पन्तले तम्घास बजारमा भुस्याहा कुकुर भुकेका कारण राती सुत्नसमेत समस्या भएको बताउनुभयो । नगरपालिकाले नागरिकहरुलाई आनन्दसँग सुत्ने वाताबरण मिलाइदिन पनि उहाँले आग्रह गर्नुभयो । यसका साथै सडकमा सवारी चलाउँदा छाडा कुकुरका कारण थप दुर्घटना निम्त्याउने जोखिम बढेको र रातको समयमा सडकमै कुकुरहरु भुक्ने र व्यक्तिको पिछा लाग्ने भएका कारण पनि ज्यान बचाउनै समस्या हुने गरेको यहाँका स्थानीयहरुले बताउँदै आएका छन् ।रेसुङ्गा नगरपालिका वडा नम्बर ९ उपल्लो तम्घासकी सीता कुँवरले बच्चाहरुलाई विद्यालय जाँदा र आउँदा पनि बाटोमा छाडा कुकुरले झम्टने भएका कारण थप चुनौती देखिएको र यसको व्यवस्थापनमा सरोकारवाला निकायले ध्यान दिनुपर्ने बताउनुभयो ।
घरपालुवा कुकुर दर्ता भए नवीकरण भएनन्
रेसुङ्गा नगरपालिकाले घरमा कुकुर पाल्न अनिवार्य रुपमा दर्ता गर्नुपर्ने बताएपछि दर्ता भएका घरपालुवा कुकुर हालसम्म पनि नविकरण भएका छैनन् । पशु विकास शाखाका अनुसार गत आर्थिक वर्षमा ४७ वटा घरपालुवा कुकुरहरु दर्ता भएको भए पनि हालसम्म कुनै कुकुर नवीकरण भएका छैनन् । नवीकरण गर्नका लागि आग्रह गर्दै आए पनि नवीकरण हुन नसकेको र थप सूचना जारी गर्ने गरी आफूहरु लागेको महराले बताउनुभयो ।
घरपालुवा कुकुर दर्ताका लागि नगरपालिकाले तीन सय रुपियाँ र नवीकरणका लागि एक सय रुपियाँ शुल्क निर्धारण गरेको छ । यसका साथै गत आर्थिक वर्षमा नगरपालिकाले १०७ कुकुरको स्थायी बन्ध्याकरण गरेको र पुस वा माघ महिनामा पनि स्थायी बन्ध्याकरण गर्ने गरी योजना बनाएको पशु विकास शाखाले जनाएको छ । गोरखापत्र
