काठमाडौं । जिल्ला प्रहरी कार्यालय सुर्खेतको हिरासतमा रहेका एक थुनुवाको मृत्यु भएको छ। लागुऔषध कारोबार मुद्दामा थुनामा रहेका वीरेन्द्रनगर नगरपालिका–११, पिपिराका ३५ वर्षीय गंगे सुनारको शुक्रबार बिहान मृत्यु भएको जिल्ला प्रहरीले पुष्टि गरेको छ।
जिल्ला प्रहरी कार्यालय सुर्खेतका प्रवक्ता प्रहरी नायब उपरीक्षक (डीएसपी) मोहनजंग बुढाथोकीका अनुसार बिहान सुनार बेहोस अवस्थामा फेला परेपछि उनलाई तत्काल कर्णाली प्रदेश अस्पताल पुर्याइएको थियो। “उनीसँगै सुतेका अन्य थुनुवाले बिहान उठाउन खोज्दा नउठेपछि प्रहरीलाई जानकारी दिएका थिए। अस्पताल पुर्याउँदा चिकित्सकले उपचारकै क्रममा उनलाई मृत घोषणा गरे,” डीएसपी बुढाथोकीले बताए। प्रहरीका अनुसार सुनार करिब ७८ दिनदेखि हिरासतमा रहेका थिए। चार दिनअघि मात्र उनको मुद्दा सरकारी वकिल कार्यालयमा पुगेको र शुक्रबार नै अदालतमा पेशी तय गरिएको थियो।
घटनापछि प्रहरी पक्षले हिरासतको सीसीटीभी फुटेज पनि परीक्षण गरेको जनाएको छ। फुटेजमा सुनार सुत्नुअघि बाथरुममा गई टाउको नुहाएर फर्किएको र सुत्दा घुर्ने भएकाले साथीहरूले उठाएको दृश्य देखिएको प्रहरीको भनाइ छ। प्रहरीले घटनाको कारणबारे थप अनुसन्धान सुरु गरेको जानकारी दिएको छ।
