काठमाडौं । बारपाक–लाप्राक सडक खण्ड दुई दिनका लागि बन्द हुने भएको छ। बारपाक सुलीकोट गाउँपालिका–१ बारपाकदेखि धार्चे गाउँपालिका–४ लाप्राकसम्मको सडक खण्डमा निर्माण तथा मर्मत कार्य गर्नुपर्ने भएकाले यही कात्तिक २५ र २६ गते सवारी आवागमन रोक्ने निर्णय गरिएको हो।
बारपाक सुलीकोट गाउँपालिकाले जारी गरेको सूचनामा पहिरो पन्छ्याउने, पर्खाल निर्माण तथा ग्राभेल बिछ्याउने कामका कारण सडक पूर्ण रूपमा बन्द गर्नुपर्ने उल्लेख छ। निर्माण कम्पनीले काम सकिएलगत्तै सडक पूर्ववत् रूपमा सञ्चालनमा ल्याउने तयारी गरेको गाउँपालिकाले जनाएको छ।
पालिकाले उक्त अवधिमा यात्रु र सवारी साधन सञ्चालनकर्तालाई बारपाक–लाप्राक सडक प्रयोग नगर्न अनुरोध गर्दै आवश्यक परे वैकल्पिक मार्ग प्रयोग गर्न आग्रह गरेको छ।
सडक मर्मत कार्य पूरा भएपछि आवागमन सहज हुने र यातायात सेवा थप सुचारु हुने गाउँपालिकाले जनाएको छ। साथै, कामका कारण यात्रुहरूलाई पर्न गएको असुविधाप्रति दुःख व्यक्त गर्दै सडक मर्मत सम्पन्न भएसँगै कात्तिक २७ गतेदेखि सडक पुनः सञ्चालनमा आउने जानकारी गराइएको छ।
