काठमाडौं । बलिउडका वरिष्ठ अभिनेता धर्मेन्द्रलाई करिब तीन हप्ता उपचारपछि मुम्बईको ब्रीच क्यान्डी अस्पतालबाट डिस्चार्ज गरिएको छ। उहाँलाई श्वासप्रश्वासमा समस्या र निमोनियाका कारण अस्पतालमा भर्ना गरिएको थियो।
धर्मेन्द्रको उपचारमा संलग्न चिकित्सकहरूको टोलीका सदस्य डा. प्रीत सम्दानीले बीबीसी हिन्दीसँग कुरा गर्दै बुधबार बिहान उहाँलाई डिस्चार्ज गरिएको जानकारी दिनुभयो।
स्वास्थ्य अवस्था सुधारोन्मुख छ वा अझै गम्भीर छ भन्ने प्रश्नमा डा. सम्दानीले भन्नुभयो, “म यसबारे बढी केही भन्न सक्दिन। उहाँलाई घर लैजाने निर्णय परिवारको थियो।”
यसअघि मङ्गलबार, धर्मेन्द्रकी छोरी ईशा देओल र श्रीमती हेमा मालिनीले सामाजिक सञ्जालमार्फत अभिनेता धर्मेन्द्रको ‘मृत्यु’ सम्बन्धी गलत समाचारप्रति कडा आपत्ति जनाएका थिए। उनीहरूले धर्मेन्द्रको अवस्था स्थिर रहेको र अफवाहमा विश्वास नगर्न जनतालाई आग्रह गरेका थिए।
