काठमाडौं । महोत्तरी जिल्लाको औरही नगरपालिकामा प्रहरीले ठूलो परिमाणको लागूऔषध गाँजा बरामद गरेको छ। जिल्ला प्रहरी कार्यालयका अनुसार औरही नगरपालिका–१ स्थित औरही चोकमा नियमित चेकजाँचका क्रममा दुई जनालाई गाँजासहित पक्राउ गरिएको हो।
बिहीबार साँझ उत्तरबाट दक्षिणतर्फ जाँदै गरेको बिआर ३० ए ०६०८ नम्बरको मोटरसाइकल रोकिएको क्रममा प्रहरीले गरेको तलासीमा झोलाभित्र प्लास्टिक र डोरीले बाँधेर लुकाइ–छिपाइ राखिएको १० केजी गाँजा फेला परेको थियो।
पक्राउ परेकामा मोटरसाइकल चालक भारत बिहार–वैशाली निवासी २७ वर्षीय गोबिन्द राम र पछाडि सवार २१ वर्षीय एकवाल मोहम्मद रहेका छन्। बरामद गाँजा तथा आरोपीहरूलाई थप अनुसन्धानका लागि इलाका प्रहरी कार्यालय गौशालाको हिरासतमा राखिएको छ। प्रहरीका अनुसार यो कारबाही क्षेत्रमा चलाइएको सुरक्षा व्यवस्थापन र लागूऔषध नियन्त्रण अभियानकै निरन्तरता हो।
