काठमाडौं । भारतको पुणे सहर बाहिर नवले पुल नजिक शुक्रबार साँझ भएको भीषण सडक दुर्घटनामा कम्तीमा आठ जनाको मृत्यु भएको छ भने करिब १३ जना घाइते भएका छन्। ब्रेक फेल भएको एक ट्रकले १३ वटा सवारीसाधनलाई ठक्कर दिँदा ठूलो जनधनको क्षति भएको भारतीय सञ्चारमाध्यमहरूले जनाएका छन्।
टाइम्स अफ इन्डियाका अनुसार फलाम बोकेको ट्रक साँझ ५:४५ बजे मुम्बईतर्फ जाँदै थियो। भूमकर पुल नजिक ‘सेल्फी प्वाइन्ट’ पुग्नेबित्तिकै चालकले ट्रकमा नियन्त्रण गुमाएको र त्यसपछि दुई ट्रक, एक कार, मिनीबस तथा दुई पांग्रे सवारीसहित १३ सवारी साधनमा एकपछि अर्को गर्दै ठोक्किएको प्रहरी नायब उपरीक्षक कदमले जानकारी दिए।
दुर्घटनामा ट्रक चालकसहित आठ जनाको मृत्यु भएको पुष्टि गरिएको छ। घाइतेहरूलाई नजिकैका अस्पतालहरूमा उपचारका लागि लगिएको भारतीय समाचार स्रोतहरूले जनाएका छन्।
प्रहरीका अनुसार दुर्घटना पुणे–नाशिक राजमार्गको भोरगाउँ क्षेत्रमा भएको हो। घटनापछि सडक केही समय अवरुद्ध भए पनि सुरक्षाकर्मीले यातायात पुनः सुचारु गरेका छन्।
