काठमाडौं । सुदूरपश्चिम प्रदेशका मुख्यमन्त्री कमलबहादुर शाहले विकासको सन्तुलन कायम गर्न आवश्यक रहेको बताउनुभएको छ । कैलालीको लम्कीचुहा नगरपालिका–४ मा बुधबार सिटी हल, सङ्ग्रहालयलगायतका संरचनाको शिलान्यास गर्दै उहाँले विकासको सन्तुलन कायम गर्न जरुरी रहेको बताउनुभएको हो । सन्तुलित बजेट निर्माणप्रति आफू चिन्तित रहेको उल्लेख गर्दै उहाँले भन्नुभयो, “पहाड र तराईको जिल्लाबिच विकासको सन्तुलन कायम गर्न आवश्यक छ ।”
पहाडी सातै जिल्लाको भ्रमण सकेर कैलाली फर्कनुभएका मुख्यमन्त्री शाहले बाजुरा र बझाङ जस्ता विकट पहाडी क्षेत्रमा विकासका कामलाई प्राथमिकता दिने उल्लेख गर्नुभयो । तराईमा विकासले फड्को मारेको भन्दै उहाँले थप्नुभयो, “अब विकास पहाड र दुर्गम बस्तीमा केन्द्रित हुनु पर्दछ ।” मुख्यमन्त्री शाहले शिक्षा, स्वास्थ्य, खानेपानीलगायतका ठुला परियोजना पनि चाँडै अगाडि बढाइने बताउनुभयो । प्रदेशको सर्वाङ्गीण विकासका लागि आफूले निरन्तर सक्रिय भूमिका निर्वाह गर्ने उहाँको भनाइ छ । मुख्यमन्त्री शाहले जनप्रतिनिधिबिच समन्वय र साझा उद्देश्य आवश्यक रहेको औँल्याउँदै सङ्ग्रहालयलाई प्रभावकारी रूपमा अगाडि बढाउन स्थानीय तह र सरोकारवाला सबै जिम्मेवार हुनुपर्नेमा जोड दिनुभयो । प्रदेश सरकारको लगानीमा सिटी हल, सङ्ग्रहालयलगायतको संरचना निर्माण भइरहेको छ । निर्माणको ठेक्का गोरखनाथ–पूर्वपश्चिम–निधि जेभी, काठमाडौँले पाएको छ । सिटी हल, सङ्ग्रहालयको कुल लागत २२ करोड ८९ लाख रुपियाँ रहने जनाइएको छ । गोरखापत्र
