काठमाडौं । प्रहरीले विराटनगर–१७ मा स्रोत नखुलेको ठूलो रकमसहित एक व्यक्तिलाई पक्राउ गरेको छ। मटेरुवा टोलबाट पक्राउ परेका व्यक्ति विराटनगर–१८ का रवि साह रहेको प्रहरीले जनाएको छ। साहको साथबाट ६ लाख ४९ हजार ५ सय रुपैयाँ बरामद गरिएको छ। को २ प ७९८४ नम्बरको मोटरसाइकलमा भारततर्फबाट नेपाल प्रवेश गर्दै गर्दा सुरक्षाकर्मीले चेकजाँच गर्ने क्रममा उक्त रकम फेला परेको हो। रकमको स्रोत खुल्न नसकेपछि उनलाई नियन्त्रणमा लिइएको प्रहरीले बताएको छ।
घटनाबारे अनुसन्धानका लागि कोशी प्रदेश प्रहरी कार्यालयको प्रादेशिक अनुसन्धान समूहबाट खटिएको टोलीले बुधबार राति साहलाई पक्राउ गरी इलाका प्रहरी कार्यालय रानीमा राखेर थप अनुसन्धान अघि बढाइरहेको छ।
