काठमाडौं । सुनसरीको इनरुवामा मेलमिलापसम्बन्धी आठदिने आधारभूत तालिम सम्पन्न भएको छ । मेलमिलाप परिषद्को आयोजनामा आठदिने अर्थात् ४८ घण्टे तालिम समपन्न भएको हो । तालिममा २७ जना सहभागीहरुलाई तालिमपछि प्रमाणपत्र वितरण गरेको आयोजक मेलमिलाप परिषद्ले जनाएको छ । तालिमको समापन सत्रमा वत्ताहरुले मेलमिलापलाई उत्कृष्ट प्रक्रियाका रूपमा लिने भएकोले त्यसमा मेलमिलापकर्ताको भूमिका हुने भएकोले तालिम प्रभावकारी भएको बताएका छन् । मेलमिलापबाट विवाद समाधान भएमा समय, मानसिक तनाव र आर्थिक समस्याको सजिलै अन्त्य हुने सहभागीाहरुले बताएका छन् । मेलमिलाप तत्कालीन समस्या समाधान मात्र नभएर समाजमा दीर्घकालीन शान्ति सुरक्षा कायम भई असल र सभ्य समाज निर्माण हुने भएकाले नयाँ मेलमिलापकर्ता उत्पादन गर्ने उद्देश्यले दिएको परिषदका अध्यक्ष कुमार रेग्मीले जानकारी दिनुभयो । तामिलमा सहभागीहरुलाई तालिमका प्रमुख प्रशिक्षक चुपबहादुर थापा, प्रमुख अतिथि भद्रकाली पोखरेल, परिषद्का अध्यक्ष कुमार रेग्मीले प्रमाणपत्र वितरण गर्नुभएको थियो ।
कार्यक्रममा दिएको जानकारी अनुसार न्यायिक समितिबाट ८०-७० प्रतिशत विवाद समाधान हुँदै आएको र अदालतमा पनि मेलमिलापको माध्यमबाट देवानी प्रकृतिका मुद्दा मिलाउँदै आएकोले स्थानीय स्तरमा पनि मेलमिलाप उत्पादन गर्ने गरी तालिम दिएको छ । अदालतमा न्यायाधीशले एक पक्षलाई हराउने र अर्को पक्षलाई जिताउने काम गर्नुपर्दा न्यायाधीशलाई नै न्यायाधीश भएको हुनुमा गर्व नलाग्ने गरेको अनुभवसमेत रहेकाले पक्षहरुको हितहित र जितजितको लागि मेलमिलाप आवश्यक रहेकोमा जोड दिएको छ । तालिममा सहभागी रिभा कर्णले भन्नुभयो, “सफल मेलमिलापकर्ता हुनु ठूलो गौरव हो । मेलमिलापकर्ताले दुबै पक्षलाई जिताउँछ ।
दुबै पक्षको मन र मस्तिष्कमा हुने भएकोले पक्ष विपक्ष तथा मेलमिलापकर्तालाई भित्रैबाट सन्तुष्टि हुनुले मेलमिलापप्रति सर्वसाधारणको सकारात्मक धारणा रहेको छ ।”मेलमिलाप परिषद्को आयोजनामा सञ्चालन भएको मेलमिलापकर्ताका लागि आधारभूत तालिमको महत्व तथा विषयवस्तुको गम्भीरताले व्यक्तिगत जीवन र संस्थागत जिवनमा पनि उपयोगी भएको सहभागी रामकुमार मेहताले बताउनुभयो । तालिम अदालतका कर्मचारीलाई समेत दिएकाले निकै फलदायी र सार्थक भएको सुनसरी जिल्ला अदालतका इजलास अधिकृत रामखेलावन मेहताले बताउनुभयो । अर्का अधिकृत अरुणकुमार मेहताले तालिम निकै उपयोगी भएको प्रतिक्रिया दिनुभयो । गोरखापत्र
