काठमाडौं । हाल देशभर कुनै उल्लेखनीय मौसम प्रणालीको प्रभाव नरहेको जल तथा मौसम पूर्वानुमान महाशाखाले जनाएको छ। महाशाखाका अनुसार बिहीबार दिउँसो कर्णाली र सुदूरपश्चिम प्रदेशसहितका हिमाली भूभागमा आंशिक बदली रहनेछ भने बाँकी भूभागमा मौसम प्रायः सफा रहने अनुमान गरिएको छ।
मौसम स्थिर रहेकाले देशका अधिकांश स्थानमा दैनिक जनजीवनमा खासै असर नपर्ने महाशाखाले जनाएको छ। तर हिमाली क्षेत्रका केही स्थानमा आंशिक बदली देखिन सक्ने जनाइएको छ। यसैबीच, काठमाडौँ उपत्यकाको मौसम पनि सामान्य रहने अपेक्षा गरिएको छ। आज उपत्यकामा न्यूनतम तापक्रम ५ देखि ७ डिग्री सेल्सियस र अधिकतम तापक्रम १७ देखि १९ डिग्री सेल्सियसको आसपास रहने महाशाखाले जानकारी दिएको छ।
