काठमाडौं । सुनसरीको हरिनगर गाउँपालिका–४ स्थित हरिनगरा माध्यमिक विद्यालयमा कक्षा ८ मा अध्ययनरत १३ वर्षीया छात्रा पूजा कुमारी दासमाथि शिक्षकले कुटपिट गरेको घटना सार्वजनिक भएको छ। विद्यालयका ४७ वर्षीय शिक्षक रघुनाथ मेहताले गृहकार्य नगरेको भन्दै पुस ९ गते छात्रालाई मुक्का र लठ्ठीले कुटपिट गरेको बताइएको छ।
घटनाका साक्षी रहेका कक्षाका विद्यार्थीहरूका अनुसार शिक्षक मेहताले घरायसी विवादका कारण तनावमा रहेकाले कुटपिट भएको दाबी गरेका छन्। यस घटनाप्रति आक्रोश व्यक्त गर्दै छात्राका अभिभावक सुरेश पालले दोषी शिक्षकमाथि कडा कारबाहीको माग गर्नुभएको छ। यसबीच, पुस ११ गते विद्यालयमै विद्यार्थी कुटपिटको विषयलाई लिएर दुई पक्षबीच छलफल तथा वार्ता भएको थियो। वार्तामा दुवै पक्षले आफ्ना धारणा राखेका थिए। विद्यालयका प्रधानाध्यापक बलराम मण्डलका अनुसार शिक्षकले आफ्नो गल्ती स्वीकार गर्दै अबदेखि भौतिक आक्रमण नगर्ने प्रतिबद्धता जनाएका छन्। साथै, विद्यार्थीहरूलाई पनि अनुशासनमा बस्नुपर्ने विषयमा सहमति जुटेको उहाँले जानकारी दिनुभयो। घटनाप्रति प्रतिक्रिया जनाउँदै स्थानीय पत्रकार जुगेस दासले शिक्षकजस्तो जिम्मेवार र सम्मानित पदमा बसेर अहङ्कार देखाउनु अनुचित भएको बताउनुभएको छ।
