काठमाडौं । ताप्लेजुङमा उत्पादन गर्न लागिएको तमोर–मेवा जलविद्युत आयोजना निर्माणको काम सुरु भएको छ । बहु प्रतिक्षित तथा चर्चित आयोजनाका रुपमा रहेको १२८ मेगावाट क्षमताको तमोर–मेवा जलविद्युत आयोजना निर्माणको काम सुरु भएको हो । जिल्लास्थित मेवा खोला र तमोर नदीको पानीको उपयोग गरी आयोजना निर्माण गर्न लागिएको छ । स्पार्क हाइड्रोइलेक्ट्रिक कम्पनी लिमिटेडको प्रवर्धनमा निर्माण हुने आयोजनाको काम सुरु भएको छ । निर्माणको काम सुरु भएसँगै हालसम्म करिव २२ प्रतिशत कामको प्रगति भइसकेको प्रवर्धक कम्पनीका संस्थापक अध्यक्ष एवम् सञ्चालक भानेन्द्रकुमार लिम्बूले जानकारी दिनुभयो ।
सञ्चालक लिम्बूका अनुसार कम्पनीको मूख्य कार्यालय, आयोजना शिविरका संरचना, निर्माणस्थलमा आउजाउ गर्ने सडकहरु निर्माण भइसकेका छन् । त्यस्तै, बालुवा थिग्राउने पोखरी, अडिट र मुख्य सुरुङ निर्माणको काम पनि सुरु भएको लिम्बूले जानकारी दिनुभयो । लक्ष्यअनुसार नै आयोजना निर्माण सम्पन्न गर्नेगरी कामलाई निरन्तरता दिइने उहाँले बताउनुभयो ।आयोजना निर्माणको प्रारम्भमा प्रवर्धक कम्पनीले बेहोर्ने २५ प्रतिशत लागतको खर्चबाट काम भइरहेको पनि उहाँको भनाइ छ । आयोजनाको कुल लागत रकम भने करिव २६ अर्ब रुपियाँ रहेको छ । आयोजनाका लागि सिद्धार्थ बैङ्क लिमिटेडको अगुवाइमा माछापुच्छ्रे बैङ्क लिमिटेड, एसबिआई बैङ्क लगायतको रहेको मुख्य लगानी रहेको छ ।
तमोर मेवा आयोजनाबाट १२८ मेगावाट क्षमताको विद्युत उत्पादन गर्नेगरी प्रक्रिया सुरु गरिएकोमा निर्माणको चरणमा पुग्दा १७ मेगावाट थप हुने भएपछि आयोजना कुल १४७ मेगावाट क्षमताको हुने भएको पनि लिम्बूले बताउनुभयो । सुरुमा १०१ मेगावाट क्षमताको विद्युत उत्पादन गर्नेगरी प्रक्रिया सुरु भएको आयोजना निर्माणको काम भने करिव २६ वर्षपछि सुरु गरिएको छ । कम्पनी दर्ताको प्रक्रिया वि.सं २०५६ मङ्सिर महिनादेखि नै प्रारम्भ गरिएको थियो ।
यता तत्कालका लागि तमोर नदीको पानी मात्र उपयोग गरेर आयोजना निर्माण गर्नेगरी काम सुरु गरिएको पनि कम्पनीका संस्थापक अध्यक्ष लिम्बूले बताउनुभयो । तमोर नदीबाट आयोजना निर्माण हुने हुँदा आयोजनाको विभिन्न संरचनाहरु फुङ्लिङ नगरपालिकाभित्र रहने छ । आयोजनाको मुख्य प्रभावित क्षेत्रका रुपमा फुङ्लिङ नगरपालिका–१, वडा २, वडा नम्बर ३, वडा नम्बर ८ दोखु र वडा नम्बर ९ हाङ्देवा पर्छ ।आयोजनाको मुहान अर्थात मुख्य बाँध फुङ्लिङ नगरपालिका –१ दगुर्नेमा पर्दछ भने विद्युतगृह वडा ३ स्थित तमोर नदी किनार गुयेलीमा रहने छ । मुख्य सुरुङको दूरी पाँच किलोमिटरको हुने आयोजनाले जनाएको छ । यसअघि आयोजनाको २०८१ जेठ १० गते तत्कालीन संधिानसभाका सदस्य सञ्चपाल मादेनले शिलान्यास गर्नुभएको थियो । गोरखापत्र
