काठमाडौं । सशस्त्र प्रहरीको श्रमदानबाट फिदिम नगरपालिका वडा १० का विपन्न परिवारको घर निर्माण भएको छ । तीन जना छोराछोरीका साथ खोल्सा नजिक पाखामा घाम पानी छिर्ने जिर्ण कटेरोमा जीवनयापन गर्दै आउनुभएका पूर्णकुमार र सम्झना आङ्बोका लागि सशस्त्र प्रहरीको फिदिमस्थित हिमशिखर गुल्मले १२ दिनसम्म प्रहरी कर्मचारी खटाएर घर बनाइदिएको हो । नव निर्मित घर निर्माणपश्चात् हस्तान्तरण गरिएको छ । सशस्त्र प्रहरी बलको २५औँ स्थापना दिवसको अवसर पारेर स्थानीय पूर्णकुमार आङबो र सम्झना आङ्बो दम्पतीका लागि घर निर्माण गरिएको गुल्मपति तथा सशस्त्र प्रहरी नायब उपरिक्षक चिरञ्जीवी प्रसाईले जानकारी दिनुभयो । तीन जना छोराछोरीसहित घामपानीसमेत छेक्न नसक्ने सानो कटेरोमा बसोबास गर्दै आएका आङबो परिवारको दयनीय अवस्था देखेपछि स्थानीय शिक्षिका रीता तुम्बापोले सार्वजनिक रूपमा सहयोगको आह्वान गर्नुभएको थियो ।
उहाँको पहल र जन सेवा समाजको समन्वयमा ढुङ्गा, माटो, टिन र काठ प्रयोग गरी दुईकोठे चिटिक्क घर निर्माण गरिएको हो । घर निर्माणका क्रममा सशस्त्र प्रहरीका आठ जना कर्मचारीले निरन्तर १३ दिन श्रमदान गर्नुभएको थियो । काठपात स्थानीयस्तरमै व्यवस्थापन गरिएको थियो भने टिन तथा अन्य सामग्री फिदिम नगरपालिका र वडा नम्बर १० को कार्यालयबाट उपलब्ध गराइएको जनाइएको छ । साथै, मनकारी व्यक्तिहरूबाट समेत नगद सहयोग प्राप्त भएको शिक्षिका तुम्बापोले जानकारी दिनुभयो । प्रहरी नायव उपरिक्षक प्रसाईंले सशस्त्र प्रहरी बलको सामाजिक उत्तरदायित्व अन्तर्गत यो सहयोग गरिएको बताउनुभयो । ढुङ्गा माटो टिन र काँटी प्रयोग गरेर बनाइएको घर २ कोठाको छ । यो घर निर्माण गर्न ८ जना प्रहरीले निरन्तर १३ दिनसम्म श्रम गरेका थिए भने वडा कार्यालय र नगरपालिकाले टिनलगायतका सामग्री सहयोग गरेका छन । केही स्थानीयले आर्थिक सहयोग उपलब्ध गराएको घर निर्माणको समन्वयकर्ता शिक्षिका तुम्बापो बताउनुहुन्छ । निर्माण सकिएसँगै आङ्बो परिवार शुक्रबारदेखि नयाँ घरमा सरेको छ । गोरखापत्र
