काठमाडौं । बैंक तथा वित्तीय संस्थामा ऋण प्रवाह गर्न मिल्ने रकम (तरलता) अत्यधिक भएपछि नेपाल राष्ट्र बैंकले बजारबाट ५० अर्ब रुपैयाँ झिक्ने भएको छ। राष्ट्र बैंकले निक्षेप संकलन उपकरणमार्फत ४६ दिनका लागि उक्त रकम संकलन गर्न लागेको जनाएको छ।
पछिल्ला तीन वर्षदेखि राष्ट्र बैंकले सातामा दुईपटक—आइतबार र बुधबार—नियमित रूपमा बजारबाट तरलता व्यवस्थापन गर्दै आएको छ। केही साताअघि भने राष्ट्र बैंक ऋणपत्रमार्फत रकम संकलन गरिएकाले निक्षेप संकलन उपकरण जारी गरिएको थिएन। त्यसपछि पुनः नियमित तालिकाअनुसार सातामा दुई दिन निक्षेप संकलन प्रक्रिया अघि बढाइएको हो।
राष्ट्र बैंकले जारी गरेको सूचनाअनुसार निक्षेप संकलन कार्यक्रममा सहभागी हुन इच्छुक बैंक तथा वित्तीय संस्थाले आज दिउँसो ३ बजेसम्म अनलाइनमार्फत बोलकबोल गर्न सक्नेछन्। यसमा ‘क’, ‘ख’ र ‘ग’ वर्गका बैंक तथा वित्तीय संस्था मात्र सहभागी हुन पाउने व्यवस्था गरिएको छ। संकलन गरिएको निक्षेप संकलन उपकरण अन्य बैंक तथा वित्तीय संस्थामा धितोका रूपमा प्रयोग गर्न सकिने पनि जनाइएको छ।
बोलकबोल न्यूनतम १० करोड रुपैयाँ र ५ करोड रुपैयाँले भाग गर्दा निःशेष भाग जाने गरी गर्नुपर्नेछ। ब्याजदरका आधारमा बोलकबोल गर्नुपर्नेछ भने बहुब्याजदरमा बहु–बोलकबोल गर्न सकिने व्यवस्था रहेको राष्ट्र बैंकले स्पष्ट पारेको छ।
